طلتي الغيبة
بكتب وقلبي يتقطر قلق ومخافة
علك طيبة
والبيناتنا اكتر من زمان ومسافة
مليان ريبة
والايام بدونك مستحيلة وجافة
الاشواق كتار يا حبيبة
كيفك في مناطق الشِدة؟
والوضع المُقيت الحالي
مشتاق يا خُلاصة الوردة
للنضم الجميل الحالي
الشوق من هنا ل أمبدة
ياريت لو بتعرفي حالي
ولا تجيني منك نسمة
ونعيد بينا تاني ليالي
آمنة ومنعشة ومبتسمة
برسل! ما بتجيكِ رسايلي؟
إتصل!
ارجى صوتك يجيني
بيجيني المجيب الآلي
إنفعل!
الا كيفن أهدا؟
بس وريني كيفن أهدا
خوفي علي البلاد وعليكِ
والقلق الكتير يا فردة
ايامي البقت متشابهة
والعمُر اللي روّح وعدا
ساعات السعادة قصيرة
وايام الحزن ممتدة
العين ما بتشوف الجاي
لكن قلبي كلو بصيرة
والواحد بروح وشن بِبقى؟
غير حُسن الذكر والسيرة
الاخلاق مقاس .. ما الخِلقة
السودان مداس.. يا اميرة
لكن لا مناص .. من رِفقة
أزمتي في الأساس .. الحيرة
اخير صوت الرصاص .. والطلقة
ولا غنا الخلاص .. والجيرة
عندنا لسة باقي اماني
عندك عندي لسة اغاني
عندي عليكي إني بعاني
وعندي وكت ابتني بلادي
وافخر إني زول سوداني
مشتاق لشوارع الحلة
حيث هواي وإطمئناني
والجواي بيعرفو الله
بس الله البيعرف راني
لكن انتِ وينك مافي ؟
وانا متضايق
حلفتك زمان ما تخافي
لو جاك عايق
لو طيبة وكويسة وعافيِ
حأكون رايق
لو اصحى وتجيني رسالة
لو اعرف جميع احوالك
لسة على هواكِ وبالك؟
” أكتبي ليّ
لا خبر لا جواب
حاصل إيه مالك ؟
