عمار الشريف يكتب: همس الحروف

جدة

( إستجابة شرطية )

في السايكولوجي بتلقى تعبير “الإشتراط النفسي” أو “الإنعكاس الشرطي البافلوفي”.. تعبيرين لنفس الشئ..

والتعبير جاء من تجارب عالم النفس “بافلوف” في تجربة (الكلب والجرس)

خلاصة التجربة انو قام بتدجين كلب.. انو لما يحين موعد الأكل، بافلوف بيضرب الجرس.. الكلب بيجي ياكل الفيها النصيب..

استمرت الحاجة دي فترة..

جرس = أكل.. جرس = أكل..

لما وصل مرحلة انو يوقف الأكل.. ويضرب الجرس..

وبقى الكلب بيسيل لعابه مع الصوت، حتى بعدم وجود أكل..

يعني الكلب صنع (استجابة شرطية) بين صوت الجرس والأكل.. برغم انو صوت الجرس نفسه ما بيعني شئ لباقي الكلاب..

الحاجة دي بتحصل مع البشر كمان..

كتير بتحصل انك تشم ريحة عطر مثلاً، وبتتذكر واحدة من ماضيك.. أو تسمع نغمة معينة وتحس بشعور مفاجئ غريب..

الفكرة انو دماغك صنع (إستجابة شرطية) بين الرائحة والبنت دي زمان (لانك شميت الريحة فيها كتير).. وصنع استجابة شرطية بحيث انو الرائحة بقت بترمز للبنت نفسها..

(بتشد/ي في ريحه معينه وشكل جسم معين)

مرات إنت ما بتكون واعي للمسبب..

هنا بجي الجزء المرضي..

بتسمع صوت الباب بدق وقلبك بنقبض.. أو بدخل وقت المغرب وبتحس انك خايف.. او بتشوف مكان معين وبجيك شعور قلق وخوف غير مبرر.. أو تخاف من الأصوات العالية..

ده جزء كبير من إضطراب القلق.. انو الأصوات، والروائح دي بتذكرك بخبرة ما في ماضيك..

الفوبيا كمان بتحصل لنفس السبب..

خبرة سيئة جداً اختار دماغك انو يتجاهلها، لكن ظلت بقاياها من الروائح والأصوات والبيئة المريت فيها بالخبرة السيئة حية.. وكلما تشم، او تسمع صوت ما، برن في ذهنك جرس الواقعة دي..

مامتذكر الواقعة انت، لكن بتحس بكل مشاعرها..

القلق العام غير المبرر.. والخوف العارم.. وشعور توتر عام بجتاحك..

البعرة تدل على البعير..؟! نفس الشي..

بجي دور العلاج النفسي هنا في انو بزيل ضباب دماغك.. وبتابع الإنعكاس الشرطي ده لآخرو.. حتى يصل للمصدر..

لمن تفهم حقيقة شعورك..

هنا بتبدأ تواجه سبب مشكلتك الأساسي..

وبتتحل العقدة.

بعد الحرب محتاجين للكثير من العلاج النفسي

لما اصابنا من اكتئاب واضراب

عبر هذه النافذة سوف نطرح الكثير الورشتات التي يحتاجها كل منا

حتي الخروج من الازمة