– خليل فرح جدي وأفتخر..
-أول بداياتي مع الكتاب الدرامين كانت مع قاسم أبو زيد
– أتمنى الدرامين ما يحتاجوا دعم من الدولة
حوار : أبية الريح
– ما الذي قاد لدخولك معهد الموسيقى، رغبة ام صدفة؟
رغبه شديدة
– هل الأسرة كانت موافقة على دخولك للمعهد؟
الاسره فقط الوالد رحمه الله هو من ساندني بالعكس كل الاهل كانو معارضين وبشدة
– هل كانت في علاقة بينك والدراما قبل دخولك المعهد؟
علاقتي بالدراما قبل المعهد فقط الحب الشديد لها متمثله في نشاطات المدارس والدورات المدرسيه
– هل الأسرة عندها علاقة بالمسرح؟
خليل فرح جدي وافتخر من الاهل هناك من درس الفنون والدراما واحفاده درسو موسيقي
– مع أي كاتب دراما بتلقي نفسك؟ والنصوص القدمت ليك هل رفضتي نص درامي؟
كل الكتاب الدرامين تقريبا انا اشتغلت معاهم ومعظم المخرجين كانو كبار جدا بدايتي مع قاسم ابو زيد الكاتب كان الفاتح البدوي رحمه الله وبعدو مباشرة قاسم مع عبدالناصر الطائف وببعدو مجدي النور وهلم جرا واخيرا من الشباب اشرف بشيرواحمد عجيب واخر كاتب طه الملقاوي قد تكون هناك اسامي عظيمه لم انساها فقط زكرت البدايات والنهايه وهناك كاتبه جميله انتصار دار المطلقات
– اي دور محبب لاخلاص في الدراما؟
كل الأدوار البكون فيها اختلاف عن آخر شخصيه عملتها او عكسها تماما
– النص الدرامي اللي من خلاله اتعرفتي ك ممثلة؟
اتعرفت واتقدمت للوسط الفني من اول ظهور قاسم في مسلسل (أقمار الضواحي) وفيديو كليب (حبي ليك كان زادي) مع سيف الدولة الملثم ومنها بدت الادوار تعرض
– هل بتقبلي انك تمثلي مع مجموعة معينة من الدراميين. وللا ما عندك مشكلة ما بتتوقفي مع أي زول
علي حسب وبالفعل شاركت مع مجموعات وفرق انا ما عضو فيها منها الاصدقاء وتيراب وجبريل وودالظلط وجلواك وغيرهم علي حسب الشخصية
– علاقتك بالقروش في الشغل، هل بتوافقي بأي قروش، وللا تقيمك بكون حسب شنو؟
القروش حسب الشغل وحسب الدور مرات في اعمال بتكون انت اضافه ليها ومرات في اعمال هي اضافه حقيقيه ليك في الدراما نتساهل جدا في الجانب المادي ودي حاجه ماكويسه بس اتعودنا عليها
– هل إخلاص نور الدين ممكن تكون مغنية في يوم من الأيام، أو هل حصل مرة فكرتي؟
يخربني غير الببا علب المربى وبقت ترند لكن الا للضرورة الدراميه حصل مثلت فنانة وشاعرة
– هل جاتك مجرد فكرة لكتابة نص درامي؟
نص كامل لم أوفق ولكن في الشروق في برنامج أفراح النيل قمت بتأليف ٧٠ حلقة ٥ دقايق و١٠ دقايق ومثلتها
-هل إخلاص نور الدين اترفعت على مجتمعها ومن حولها بعد الشهرة أم هي نفسها اخلاص قبل الشهرة؟
ابدا اخلاص نورالدين كل البعرفني يشهد علي ذلك وعلي شنو ولو افترضنا في شهره معناها في جمهور هل يعقل إنسان سوي يتعالي علي شخص حباهو لله من تواضع لله رفعه ربنا يحبب خلقه فينا
– ما رأيك في جملة الشهرة متاعب
متاعب الشهرة فقط مابتكون مرتاح وانت في حته لأنو الناس بتراقبك فلازم ماتخزلهم وتكون زي ما هم عاوزنك بالضبط
– معجبي إخلاص نور الدين هل في يوم سببوا ليك ازعاج
أبداً حتي المعجبات صارت بينا علاقات أسرية وحتي الجنس الآخر لايتعدوا الحدود قمه في الاحترام ولو حصل انزعجت من تصرف أحدهم مابجرحو ولا بشاكلو بسكت مابرد
– هل رقم إخلاص نور الدين متاح للشعب السوداني؟ وهل إخلاص بتستقبل اي مكالمة؟
معظم البلاقيهم بطلبوا رقمي بديهو ليهم وبستقبل وبسلم وبدردش كمان
– كلمة أخيرة…؟
أتمنى الدرامين فقط مايحتاجوا للدعم من الدوله ولا غيرهم ويعيشوا حياة كريمة ويعي المجتمع السوداني دور الدراما وبس، يعني لو مرضت أعرف حتعالج وين وكيف اتمني ما أكون مهمومه وخايفه من بكرة.
