قلبي !
عاذرك انا لو يوم
وقفت بدون سبب !
عاذرك انا لو هدّ
قواك التعب !
انا عشت بيك
وعشقت بيك !
ساهرت بيك كل العمر
لا كلّ نبضك لا فتر !
لوّنت بيك فرح الحياة !
حاضر معاي
عند الصلاة!
والريدة انت مكملة !
عاذرك انا لو يوم
سهيت ونسيت تدق !!
لو سدّ شريانك ارق !
او حتي قلت انا مالي بيك !
وخليتني اغرق في العرق !
عاذرك انا وشاكرك انا !!
ما انت فاتح للجميع
سكة وطريق !!
عابرين سبيل شلة
وصحاب !
اطفال صغار والبسمة
باب !
مرات اقول يمكن
اودع
وانت شغال في
الضرب !
ومرات اقول يمكن
تقيف
وانا ماشي في نص
الدرب !
ومرات اخاف يمكن
تقيف
وانت بتحب !
واقعد اسب !
مالك يا قلب
ما ليا رب!
ما نحن لسع في
اللعب!
لا خنت بيك !
لا غدرت بيك !
لا شلت جواك الندم
لا يوم قصدتك في
حسد!
دق يا قلب !!
ما إت حنين وتترجي !
خليها من غيرك تجي !
جواك سر اوعك تشي!
ودق !
نحن عاشقين
كل شي !!
