إنسرب التعب في الروح
وبرد الشولة فيك صبيب
وحسك من جواك مبحوح
خت ليها اليقين كجرة
وجرحك لمه ماتزعل
يا ما الدنيا فيها جروح
وانت بتعرف الايام
كم عاقرت من احزان
وكم عاقرت من افراح
صدوح وصدوح
وكم لوليت هموم ليلك
وفي صبحك بكون وشك
دوام مطروح
وكم نبحت كلاب
سعرانة في دربك
وكم غنت بلابل الدوح
اتحزم وابقى رقيق
وصبرك يبقى ليك الزاد
اكان اتمد بيك طريق
وطالب الزاد ما بعدم وقود النار
بعد مايلقى ليهو دقيق
منو العارف رجوعك وين
منو الشاهد مرقتك عوم
مع الفجرية قبال ماتفك الريق
الجمعةالبقت نكارة
لا بتنطاق ولا بتطيق
وماعون الكريم ممهول
مهما الدنيا في نظرك
تضيق وضيق
والنحلة التمص الزهرة
ما هماها صرخات الوجع
في بتلة
اكت سموهو ليها رحيق
والجعلي البعدي اليوم
خنق صفيق
اكيد مجبور يشيل الفاس
مهما الليد تكون مليانة بي البقيق
لي قدام فرقتك باينة ماتندم
رفيق المولى مابعدم معاه رفيق
سماحة الفرة تعجب دوم
لكن وين وين ليها القماري ام زيق
اتلفح تياب طبعك
ايدك للعشير ماتعيق .
ــــــــــــــــــــ
