جابولنا الكرامة وصبحنا فرحانين ضربوا دنقرُن جوني العيال مارقين ،،،،
بالفعل ساهرنا الليل كلو مبسوطين مع الهلال عبر الميديا ، وأصبحنا فرحانين مسرورين وربما نضبح الخرفان ونسلخها ونوزعها برغم انها غالية فى بلد الثروة الحيوانية .
بفوز حبيب الملايين البارحة اكتسى كل السودان برغم الخراب والدمار بنسمه باردة من الافراح والليالي الملاح بين مديح وغناء حتى كانت العلامة الفارقه في هذه الاحتفالات هو :
هلالنا يا سيد البلد فرّحتنا وشلناك امل
يا الانت بيك رفع البلد يوم فوزك الأفراح تهل
يا ما بتعرف المستحيل بتخلق الأمل الجميل
علمتنا ودرستنا حسن التصرف والعمل ..
لم يكن الهلال في حاجة لأكثر من تعادل سلبي بدون أهداف من أجل وقع قدميه على دور المجموعات الإفريقية مع الكبار ولكنه حقق ثلاثة نقاط و هدف غربالي ملعوب .
انه هلال العظمة والشموخ والعزة سطع في سماء أرض الشناقيط وعم نوره ارض السودان بأكملها وصعد مع الكبار وهو خير من يجيد اللعب مع الكبار .
من غيره يفرح الشعب السوداني ويعيش معه حلاوة الانتصار .
فرسان الهلال صالوا وجالوا في نواكشوط وطوعوا الصعاب وكان النصر والتأهل عن جدارة علي حساب الفريق العاجي العنيد ، بعد ان تعادل الهلال هناك فى كوت ديفوار بهدفين لمثلهما ساعتها حلفت بأغلظ الإيمان أن الهلال ضمن العبور لمجموعات الكبار ….
غابت قمرات السماء طيلة زمن المباراة ولكن هلال السودان فاض نوره علي الكل وعوضنا عن القمر .
هدف للهلال من سيف الهلال البتار الغربال وكان التأهل بجدارة.
من غيرك يا هلال يفرحنا ولأنكم فرسان الحوبه واهل الحارة ودخري الأمة بقيادة السوباط والعليقي وصديقنا البروف حسن على عيسى الذى ننتظر منه مقال كارب كالعاده يتغزل فى الهلال ، مقال رائع مبخر بالطمي وسعف النخيل واسلاك الطنابير .. إ
الرجل تعجبنى كتاباته لأنها بشجن وصدق تدخل القلب ، وله قلم سيال كجدول ماء يمر على نخلة في عيد لقاحها الاول ويجرتقها بعراجين عالية المذاق.
من حق جماهير الهلال ان تخرج في مظاهرات فرح احتفاء بتأهل الهلال وحجزه مقعده مع الكبار.
خذلنا المريخ ونصرنا الهلال نقول مبروك للهلال وحظاً اوفر للمريخ .
ختاماً |
الحمد لله وقد نثر الهلال كل الافراح في قلوب اهل السودان… وندعوك ربي ان تستمر الأفراح ، نعم انه الهلال هو سيد الفرح…. ومن غيرنا يفرح هذا الشعب المكلوم… !!
وعشت يا هلال يا معشوق الملايين .
